Градоначалникот на Битола Владимир Талески заедно со општинскиот претседател на Комисијата за јавни набавки и група превозници ги местеле тендерите за превоз на ученици со што општина Битола го плаќала најскапиот превоз во светот, рече обвинителката Фатиме Фетаи на денешната прес-конференција во Специјалното јавно обвинителство (СЈО).
Истрагата, која СЈО ја нарече „Транспортер“ опфаќа вкупно 81 криминално дејствие, спротивни на Законот за јавни набавки и Законот за средно и основно образование.
Осомничени се 22 лица за злоупотреба на службената положба, а за 11 од нив побарана е мерка притвор.
За градоначалникот Талески, против кого не може да се отвори кривична постапка бидејќи е аболициран од Претседателот, СЈО бара конфискација на имотот, за кој се смета дека е стекнат преку ваквите дејствија. Одлуката за конфискација е на судот.
-Од вештиот наод и останатиот прибран материјал ова Обвинителство стекна сериозно уверување за штетни финансиски последици врз буџетот на Република Македонија, а со тоа врз граѓаните на оваа држава. Превозниците нанеле вкупна штета во износ од илјадници евра за само две учебни години, посочи Фетаи.
Талески одобрувал фактури значително поголеми од договорените
Градоначалникот Талески во 2009 година донел одлука за јавна набавка за превоз на ученици преку средствата предвидени во буџетот за јавен превоз на ученици од средните училишта.
Се формирала Комисија за јавни набавки која спровела постапка, а потоа Талески како од позиција на градоначалник за најповолни ги избрал превозниците Хера Турс, Транскоп АД Битола, Џем Турс Битола и Боби Турс Битола. Веднаш потоа од страна на управителите на оваа лица, биле фактурирани износи значително поголеми од договорените суми кои градоначалникот без проблем ги одобрувал и потпишувал налози, а истите биле одобрени и од директорите на училиштата.
Наплата била извршена во периодот 2012 – 2014 година , а на ист начин е направена злоупотреба на буџетските средства и со директорите и превозниците за основните училишта.
-Општина Битола преку градоначалникот го плаќала превозот на ученици на сите возможни начини, со цел да го оштети буџетот на Македонија, а во корист на локалните правни лица кои вршеле превоз. Локалната самоуправа на Битола преку градоначалникот превозот на учениците го плаќала и на правните лица за организиран превоз на ученици, меѓутоа и на транспортните претпријатија кои биле носители на општинскиот линиски превоз за потребите на сите граѓани на општина Битола, односно го плаќала два пати, рече обвинителката Фетаи.
Поради ова, од Специјалното јавно обвинителство поднесено е барање за определување најстрога мерка за обезбедување присуство во постапката мерка – притвор и мерки против имотот за дел од осомничени и превозниците. СЈО исто така бара и забрана за располагање со 3 стана, 8 патнички моторни возила и 33 автобуси за осомничените во предистражната постапка.
Талески е осомничен за повеќе дела
По одлуката на претседателот Иванов за колективна аболиција на 56 лица меѓу кои и градоначалникот на Битола – Владимир Талески, од Специјалното обвинителство велат дека против него се водат и други постапки за коруптивни дејствија за кои тој не е аболициран од Претседателот. Во интерес на истрагата, обвинителите не дадоа детали за кои дела точно се работи.
Засега е побарана само конфискација за дел од имотот на Талески, но доколку против него во иднина се отвори друга постапка, ќе може да се побара притвор, бидејќи аболицијата важи само за едно конкретно дело.
-Согласно член 97 од Кривичниот законик, никој не може да ја задржи непосредната и посредна корист прибавена од кривично дело, а одлука за конфискација судот ќе донесе во постапка определена со закон и кога од правни пречки не е можно водење на кривична постапка спрема сторителот на кривично дело. Според тоа ние имаме законска обврска да ги продолжиме постапките со цел обезбедување на докази за противправно прибавена имотна корист и поведување на постапки за конфискација со цел имотната корист прибавена од кривични дела да не остане кај сторителите на овие дела и да се врати во Буџетот на Република Македонија, односно на граѓаните на Република Македонија. Со ова се одзема мотивот за сторување на кривични дела и се влијае на генерална превенција од криминалитетот, одговори обвинителката Ленче Ристоска.
Талески денеска е недостапен за коментар.
Специјалното јавно обвинителство изрази сомнеж и за тоа од каде му се податоци за претседателот Иванов за тоа кого треба да помилува, кога за поголем дел од аболицираните лица, податоците не биле соопштени во јавност, ниту Претседателот ги побарал од СЈО.
Случајот со превозот на учениците, беше споменат и во 19. „бомба“ на опозицијата, во која министерот за финансии Зоран Ставрески во разговор со екс-министерката за внатрешни Гордана Јанкулоска, споменува дека битолскиот градоначалник за превоз на учениците склучил договор „коруптивен до даска“ со цени десет пати повисоки од предвиденото.