Премиерот Зоран Заев ќе ја предводи владината делегација која ќе земе учество на редовниот состанок на иницијативата „Отворен Балкан“ која ќе започне денеска со работна вечера на лидерите на трите земји и придружните делегации во Тирана, информираат од Владата.
Утре се одржува официјалниот дел од програмата во рамките на која ќе се потпишат неколку билатерални и мултилатерални договори. Меѓу нив, Договор за услови за слободен пристап до пазарот на трудот во Западен Балкан, Договор за меѓусебно поврзување на шеми за електронска идентификација на граѓаните од Западен Балкан. Договор за соработка во ветерината, безбедноста на храната, храната за исхрана на животни и фитосанитарната област на Западен Балкан. Договор меѓу Владата на Република Србија и Советот на министри на Република Албанија за взаемно признавање на овластувањата за овластен економски оператор – безбедност и сигурност (AEOS). Договор помеѓу Владата на Република Северна Македонија и Советот на министри на Република Албанија за заемно признавање на овластувањата за овластен економски оператор – безбедност и сигурност (AEOS);
На чинот на потпишување му претходи лидерска средба на која ќе говорат: албанскиот премиер Еди Рама, претседателот на Република Србија, Александар Вучиќ, премиерот на Република Северна Македонија Зоран Заев, комесарот за проширување и соседство (онлајн) Оливер Вархеји, генералната секретарка на Советот за регионална соработка Мајлинда Брегу, генералниот секретар на Советот за регионална соработка, Емир Џикиќ, директор на Секретаријатот на ЦЕФТА, Матеј Закоњшек, директор на Транспортната заедница и Марко Чадеж, претседател на Трговско-индустриската комора на Србија.
Во рамките на самитот „Отворен Балкан“ ќе се одржи Форум за агро-култура и финансии а ќе има и заедничка прес-конференција.