Премиерот Зоран Заев денеска замина за Словенија каде утре ќе учествува на лидерскиот панел „Иднината на Европа – Проширувањето“, кој е дел од 16. Стратешки форум „Иднината на Европа“ што се одржува на Блед.
Воведно обраќање на панелот ќе има словенечкиот претседател Борут Пахор, а ќе учествуваат комесарот за соседство и проширување на Европската Унија, Оливер Вархеји, претседателот на Европскиот совет, Шарл Мишел, високиот претставник на меѓународната заедница во Босна и Херцеговина, Кристијан Шмит, како и премиерите на Словенија – Јанез Јанша, на Црна Гора -Здравко Кривокапиќ, на Косово – Албин Курти, на Полска – Матеуш Моравјецки, на Албанија – Еди Рама, претседавачот и членот на Претседателството на Босна и Херцеговина – Жељко Комшиќ и Шефик Џаферовиќ, како и претседателите на Молдавија – Маја Санду и на Бугарија – Румен Радев.
На годинашниот Бледски стратешки форум, во останатите панели ќе учествуваат и многу други шефови на држави и влади од регионот и пошироко од Европа, високи претставници на институциите на ЕУ, како и на повеќе меѓународни и тинк-тенк организации.
Форумот на Блед почнува денес, а ќе трае до 2 септември.