Од Кривичниот суд преку соопштение обвинуваат дека вработениот Г.С. кој повикал трудова инспекција и се пожалил дека го преместиле на пониско работно место, не си ја вршел работата. Горан С. ова го демантира и вели дека откако протестирал со „Шарената револуција“ бил оневозможен да си ја врши работата.
Од судот појаснуваат дека на инспекторите им го презентирале целото досие на вработениот, кој од службеник вработен со средно образование, од 01.12.2015 година е унапреден и му е признаено високото образование кое го имал, и на оглас е избран за Раководител на одделението за човечки ресурси за кое имало потреба да се формира.
Во соопштението од судот, се вели дека вработените на инспекторите им појасниле дека од унапредувањето на Г.С до денеска, тој немал изготвено план и програма за работа.
„Воедно на инспекторите им е појаснето дека, од неговото унапредување до денес, иако е поставен на раководно место каде требало да презема активности од аспект на менаџирање на човековите ресурси во судот, досега ниту има изготвено план и програма ниту акциски план за работа ниту на било каков начин како раководен службеник презел активности за функционалност на ова одделение, кое за потребите на 400 вработени во судот, за прв пат е формирано со неговото унапредување. Образложено е дека истиот за изминатиот период нема сработено никаква активност во функција на платата што ја добивал како раководител и за истото нема поднесено никаков извештај до судскиот администратор како непосредно раководен службеник заради што на истиот од неодамна му е дадено задолжение да работи во друго одделени во согласност со член 60 и член 61 од Законот за судски службеници без притоа да има влијание на работата за која е избран и брз платата која ја прима како раководител на одделение“, стои во судското соопштение.
Во информацијата се дополнува дека откакао бил унапреден, му биле дадени и нови задолженија, но досега тој не сработил ниту една работна задача.
Вработениот Горан С. на ова одговори со соопштение во кое пишува дека Програмите и плановите за работа на новоформираното работно место ги составувал претседателот на судот не тој како раководител. Тој вели дека од протестите на „Шарената револуција“ на кои и тој учествувал, престанале да му даваат работни задачи и пристап до документи.
„Јас како раководител имам должност само да ги спроведувам задачите со кои ќе ме задолжи претседателот на суд. Никогаш не сум бил повикан да учествува во писмено изготвување на некаква програма во правец на работното место на во правец како работното место на кое бев назначен“, пишува во соопштението на службеникот Горан С.
