Во пресрет на најавениот голем протест на Шарената револуција, активистите на „Фејсбук“ споделија неколку совети кои ќе им бидат од корист на присутните. Се бара да не се доаѓа со деца или пак со домашни миленичиња.
„Не доаѓајте со деца, миленици и со велосипеди на протест, со бојата не целете кон полицијата, не консумирајте алкохол и други психотропни супстанци, не предизвикувајте насилство и не подлегнувајте на провокации, снимете полициско насилство, при пробивање кордони ненасилно туркаме напред“.
Во пораките уште се појаснува дека доколку евентуално се случи стампедо од луѓе, демонстрантите треба да бегаат странично и на отворено, да не се затвораат во мали и тесни улички и во влезови.
Ако граѓаните пак слушнат експлозија, тоа најверојатно ќе биде солзавец и препораката е да се бега во спротивна насока од експлозијата.
„Во случај да сте во близина на солзавецот, на марама треба да ставите млеко или сода бикарбона, која треба да ја нанесете на марама и да ги покриете носот и устата“.
Протестот под паролата „Граѓаните ја земаат правдата во свои раце“ започнува денеска во 19 часот пред Специјалното јавно обвинителство.