Градоначалникот на Скопје, Петре Шиелгов, денеска ги презентираше идните придобивки на скопјани од брзиот автобуски превоз (БРТ). За него идниот месец ќе се распишат тендерските постапки, а од март 2022 година и се очекува изградбата на трасата низ која ќе минува овој автобуски превоз. Првата линија ќе сообраќа од Ново Лисиче до Ѓорче Петров и обратно. Таа траса ќе се поминува за двојно помалку време, однсоно за околу половина час. Ќе бидат набавени околу 50 еколошки автобуси, а на првата линија автобусите ќе се движат на средина од булеварите, односно каде што се наоѓа зеленилото, на пример на булеварот Партизански одреди. Според Шилегов, тоа нема да му наштети на зеленилото.
-Зеленилото нема да претрпи штета, напротив, ќе се дуплира… Во моментов на средишните жардињери каде што треба да помине коридорот БРТ имаме 7 759 билки, од кои 619 се листопадни дрва, 1 358 се зимзелени, другото е ниска вегетација. Сега имаме еден дрворед. Тогаш ќе имаме два, имајќи предвид дека од двете страни ќе имаме зелени коридори, рече скопскиот градоначалник Шилегов.
Автобусите ќе се движат со брзина до 50 километри на час, а просечната автобуска постојка е на одалеченост од 500 метри.
По воведувањето на БРТ-системот, кој целосно се очекува да биде готов во 2025 заедно со втората траса, Скопје ќе стане првиот град на Балканот што ќе го имплементира ова модерно, економични и еколошки ефикасно сообраќајно решение, рече Шилегов.
Според планот, ќе има две линии со коридори наменити исклучиво за нив, по кои ќе се движат брзите автобуси. Дневниот капацитет на патници ќе биде 65 000. Наплаќањето нема да се врши во автобусите, туку на самата автобуска станица ќе се валидираат билетите.
-Скопје има сериозен проблем во сообраќајниот систем – недостасува брз, висококапацитативен и еколошки превоз кој ќе биде привлечен за граѓаните. Системот за брз автобуски превоз е нов тип јавен градски превоз, со физички издвоена траса за автобусите, со станици од затворен тип, со приоритет на сигнализираните раскрсници, АВЛ и информации за патниците во реално време, како и со паметни билети. Според меѓународната методологија за рангирање на брзите автобуски системи овој систем е бодиран како сребрен стандард – меѓу највисоките стандарди. Во Европа таков систем има уште во Руен, Франција и во предградие на Париз, рече професорот Никола Крстаноски од Техничкиот факултет во Битола на денешната презентација.
Генералниот менаџер на израелската компанија „РОМ транспортејшн“, Моше Хирш, рече дека нивната мисија е брзиот автобуски превоз целосно да се интегрира со постојниот автобуски систем кој е стар и треба да се реструктурира.
-Ќе направиме студии за да видиме што им треба на граѓаните на Скопје, каде живеат, каде сакаат да патуваат, во кој временски период и како. Станиците на автобусите од постојниот автобуски превоз и станиците на БРТ ќе бидат најблиску што може. Со воведувањето на БРТ, ќе се подобри услугата и на сегашниот автобуски систем со поголем број автобуси што ќе циркулираат, рече Хирш.
Втората линија на брз автобуски превоз ќе биде од Бутел до Кисела Вода и обратно. За неа сè уште се финализираат деталите, односно допрва треба да се прошират булеварите низ кои ќе минува брзиот автобуски превоз. Трасата со правец запад-исток е во должина од 12,8 км во една насока, со 21 станица, а трасата со правец север-југ е во должина од 10,4 км и 20 автобуски станици.