Ден по објавувањето на новиот случај „Трезор“, кој го отвори СЈО, министерот за внатрешни работи разреши неколку раководни лица и на нивно место именуваше нови. Од денеска повеќе не е началник Небојша Стајковиќ, кој раководеше со Одделот за информатика и телекомуникациии и кој осомничен за финансиски малверзации и злоупотреба на службена должност.
Тој е заменет со Горан Трајановски.
Досегашниот началник на единицата Алфи пак, Ивица Анчевски е разрешен од страна на министерот и е именуван за дополнителен заменик на новиот началник на оваа единица – Примислав Димовски.
Ивица Анчевски – Пуки, кој беше началник на единицата „Алфи“, чии припадници на 15 септември симулирале реакција во случај на терористички напад на Амбасадата на САД, без за тоа да ја известат амбасадата. Освен Пуки, разрешен е и неговиот претпоставен, началникот на СВР Скопје, Ивица Вучевски.
На местото на Вучевски е поставен Лазо Велковски.
Ова е една од 11-те измени кои денеска ги соопшти министерот, а кои рече дека ги прави со цел да се организираат фер и демократски избори во декември.
Според Договорот од Пржино, Спасовски по 11-те има право на уште 4 кадровски решенија.
Кирил Митиќ е именуван за началник на Одделот за сузбивање на организиран и сериозен криминал во ЦПС во БЈБ. Зоран Глигоров е разрешен од оваа позиција и останува дополнителен заменик.
Александар Јанев се разрешува од началник на Сектор за прикриени операции во Одделот за сузбивање на организиран и сериозен криминал во ЦПС во БЈБ и се именува за дополнителен заменик на началникот на Сектор за прикриени операции во Оддел за сузбивање на организиран и сериозен криминал во ЦПС во БЈБ.
Драган Симоновски е именуван на негово место.
Спасовски замени и седум началници и тие се заменети со нови: Лазо Велковски е нов началник на СВР Скопје, Злате Јаневски во СВР Велес, Љупчо Трајковски во СВР Штип, Славко Јовановски во СВР Битола, Сашо Смилески во СВР Охрид, Танчо Пројковски во СВР Струмица и Стојанче Величковиќ е нов началник во СВР Куманово.