Министерсот за внатрешни работи, Оливер Спасовски, денеска соопшти дека го искористил правото според договореното од Пржино и направил 11 кадровски промени во МВР со цел да се организираат кредибилни и фер избори во декември.
– Врз основа на измените на Законот за Влада го искористив моето право за промена на дел од раководните структури. Поточно именував 11 нови раководители на организациони едници во состав на МВР, 7 во секторите за внатрешни работи и 4 во Министерството за внатрешни работи односно во одредени оддели, соопшти Спасовски.
Тој вели тоа го направил врз основа на својата проценка и проценката на неговиот тим со единствена задача да до изборите, МВР функционира нормално, да се обезбедат услови за фер и демократски избори, да се остваруваат сите функции кои што се предвидени со законот на Министерството за внатрешни работи, да се сочува јавниот ред и мир безбедноста на граѓаните на Република Македонија како и со цел да не дозволи МВР да биде алатка во рацете на било која од политичките партии.
Помеѓу другите позиции, Спасовски менувал и во Одделот за организиран криминал, секторот за прикриени информации и во единицата Алфа, а доколку смета дека е потребно во иднина има право на уште 4 измени според измените од Пржинскиот договор.