Постапувајќи по предлог на ОЈО Скопје, судија на претходна постапка донесе решение да го прифати предлогот на обвинителството и на двајцата приведени им одреди мерка притвор, заради постоење опасност од бегство и можност да влијаат и да ја попречат истрагата – соопштија од Кривичен суд Скопје
Триесетдневен притвор за момчето А.К.(22) и девојката К.Л. (19) определил Кривичниот суд Скопје. Тие се осомничени дека со нанесување на повреди на телото на ракометарот Денис Тот извршиле кривичено дело „Убиство“. Третиот осомничен, А.Ѓ. (28), е во бегство и по него вчера Основното јавно обвинителство Скопје распиша централна потерница.
– Постапувајќи по предлог на ОЈО Скопје, судија на претходна постапка донесе решение да го прифати предлогот на обвинителството и на двајцата приведени им одреди мерка притвор, заради постоење опасност од бегство и можност да влијаат и да ја попречат истрагата – соопштија од Кривичен суд Скопје.
ОЈО Скопје вчера соопшти дека на 7 април годинава во раните утрински часови пред ноќен клуб во Скопје дошло до вербална расправија помеѓу лицето Д.Т. (28) од Р.Хрватска, со привремен престој во РСМ и лицата А.Ѓ. (28), К.Л.(19) и А.К.(22) сите од Скопје.
Тројцата сега осомничени го нападнале хрватски државјанин и му задале повеќе удари со боксови и клоци. Од ударите сега починатиот паднал и со задниот дел од главата удрил во асфалт и изгубил свест. Тројцата осомничени продолжиле со дејствија на удирање по главата, а потоа, без да му укажат помош, заминале од местото на настанот. Лице вработено во ноќниот клуб повикало Итна медицинска помош по што сега починатиот бил пренесен на Ургентниот центар при Клиниките „Мајка Тереза“.
Според информациите од лекарите што го примиле ракометарот, тој имал престанок на работата на срцето, масивен оток на мозокот, пресечен јазик и висока телесна температура. По приемот, тој бил ставен на апарати за дишење и бил во животно загрозувачка состојба, а наредниот ден и покрај обидите за реанимација починал.
Обдукцијата извршена вчераутро на Институтот за судска медицина и криминалистика утврди дека, иако нема видливи повреди, смртта на ракометарот била насилна и настапила како резултат на повреди на мозокот предизвикани од нанесените удари.