Финишира процесот за промоција на кандидатските листи за пратеници од страна на учесниците на претстојните парламентарни избори што ќе се одржат на 8 мај. Согласно роковникот за подготовка на изборите, на 2 април на полноќ истекува рокот за нивно поднесување до Државната изборна комисија.
Изминатиот викенд промоции на листите за пратеници одржаа СДСМ и Коалицијата за европска иднина, коалицијата „Твоја Македонија“ предводена од ВМРО-ДПМНЕ, Коалицијата „Европскиот фронт“ предводена од ДУИ и Движењето ЗНАМ – За наша Македонија.
СДСМ и Коалицијата за европска иднина вчера во Скопје ја промовираа „Програмата за европска иднина“ и носителите на листи и кандидатите за пратеници со кои ќе настапат на претстојните парламентарни избори. Во Првата изборна единица носител на листата е претседателот на СДСМ, Димитар Ковачевски, а како коносител ќе биде претседателката на коалицискиот партнер ЛДП, Моника Зајкова. Во Втората изборна единица ќе бидат Оливер Спасовски и Фатмир Битиќи, додека во Третата изборна единица предводници ќе бидат Сања Лукаревска и Љупчо Николовски. Носител во Четвртата изборна единица ќе биде поранешниот министер за здравство, Венко Филипче со Јована Тренчевска. Во Петтата изборна единица предводници на пратеничките листи се Јован Митрески и Бисера Костадиновска-Стојческа, а во Шестата изборна единица Славјанка Петровска и Агрон Демири.
Лидерот на СДСМ во обраќањето нагласи дека нивните ветувања се амбициозни, но реални и остварливи, затоа што, како што рече, се посветени на европскиот пат.
– Знаеме дека со напорна работа, нема недостижна цел. Ние нема да се откажеме од подобра, европска иднина за земјата. Нема откажување од иднината, рече Ковачевски.
Ковачевски истакна дека можностите за економски развој и за подобар животен стандард ќе се зголемат уште повеќе со членството на Северна Македонија во ЕУ. Потенцира дека економската програма на СДСМ предвидува подобар живот за сите и доближување на животниот стандард до европскиот.
Во Тетово вчера и Генералниот совет на Демократската унија за интеграција ги утврди носителите на листи за пратеници со кои ќе настапи на претстојните парламентарни избори. Во Првата изборна единица носител на листата ќе биде Блерим Беџети, во Втората – Садула Дураку, во Третата – Сулејман Баки од Движењето на Турците на Македонија за правда и демократија, во Четвртата – Енвер Хусеин од Демократската Партија на Турците на Македонија, во Петтата – Зијадин Села и во Шестата изборна единица носител на листата ќе биде претседателот на ДУИ Али Ахмети.
Кандидатските лист за пратеници вчера ги промовираше и ЗНАМ – За наша Македонија. Портпаролот на партијата Никола Мемов на прес-конференција соопшти дека Извршниот и Централниот одбор на партијата со акламација ги утврдиле кандидатските листи за пратеници во сите шест изборни единици и посочи дека предлог кандидатите за пратеници на Движењето ЗНАМ се луѓе кои се нови во политиката и стручни во областите во кои работат.
Изборната единица еден ќе ја предводи Бобан Карапејовски, професор на Филолошкиот факултет „Блаже Конески“ – Скопје, во Втората Дамјан Стојчевски, директор на ЈП „Чистота и зеленило“ во Куманово, во третата Павле Арсовски, генерал мајор во пензија, во ИЕ4 Миле Цеков, претседател на Стопанска комора на југоисточна Македонија, во „петката“ Весна Бендевска и во ИЕ6 е Небојша Захариевски, магистер по правни науки.
Најголемата опозициска партија ВМРО-ДПМНЕ заедно со Коалицијата „Твоја Македонија“ на конвенција во саботата ги промовираше своите кандидати за пратеници и носителите на кандидатските листи. Во Првата изборна единица носител на листата е лидерот на партијата Христијан Мицкоски, во Втората – Владо Мисајловски, во Третата – Драган Ковачки, во Четвртата – Александар Николовски, во Петата – Ѓоргија Сајкоски и во Шестата – Дафина Стојановска.
Лидерот на ВМРО-ДПМНЕ рече дека настапуваат со чесни и искрени луѓе со интегритет во кои, како што посочи, силно верува. Упати порака и до кандидатите за пратеници дека одговорноста е огромна и дека лично него ќе го имаат за противник доколку направат чекор со кој ќе нанесат штета и болка на било кого. Истакна дека овие избори ќе бидат историски важни и клучни не само за да се поправат работите, туку, како што рече, и затоа што се шанса да се испрати порака на оние кои со децении ја ограбуваат земјата.
Посочи дека програмата „Платформа 1198“ содржи 1198 проекти со кои ќе се решат проблемите на граѓаните. Оваа програма, рече, е срочена за да гарантира целосно функционирање на системот, заштита на националните интереси, квалитетно образование и модерен здравствен систем. Меѓу другото најави завршување на автопатот Кичево-Охрид, реконструкција на железничкиот коридор 10, набавка на возови, како и формирање на посебен фонд за врвна наука.
Се очекува уште Коалицијата „Вреди“ на албанските опозициски партии да ги соопшти официјално носителите и кандидатските листи за претстојните избори. Засега, како што потврди претседателот на АА, Арбен Таравари, познати се носителот во Првата изборна единица Изет Меџити, во ИЕ2 Африм Гаши и во ИЕ6 Биљал Касами.
Минатата недела листите со кандидати за пратеници ги презентираа коалицијата „Храбро за Македонија“ предводена од ГРОМ и Левица.
Носителите на листите на Коалицијата „Храбро за Македонија“ се Добрила Андоновска од ГРОМ во Првата изборна единица, Љупчо Ристовски во двојката, Јордан Николов во тројката, во Четвртата изборна единица Ружица Николова, во Петтата изборна единица лидерот на ПЦЕР Самка Ибраимоски и во Шестата изборна единица Зоран Софрески. Лидерот на ГРОМ пак Стевчо Јакимовски е претседателски кандидат.
Носители на кандидатските листи на Левица се: во ИЕ 1 лидерот Димитар Апасиев, во Двојката Амар Мециновиќ, во Тројката Борислав Крмов, во ИЕ4 Сашко Јанчев советник на Левица во Општина Гевгелија, во Петката Јована Мојсоска генерален секретар на Левица и во ИЕ 6 – Игор Димески советник на Левица во Општина Центар.
Во пресрет на претседателските и парламентарните избори, веќе се искристализирани пет коалиции и две партии кои ќе одат самостојно. Тоа се „Коалицијата за европска иднина“ предводена од СДСМ, коалицијата „Твоја Македонија“ предводена од ВМРО-ДПМНЕ, коалицијата „Храбро за Македонија“ предводена од ГРОМ, коалицијата „Европскиот фронт“ предводена од ДУИ и коалицијата „ВРЕДИ“ на албанската опозиција. Самостојно на изборите, според досегашните најави, одат ЗНАМ – За наша Македонија и партијата „Левица“.