Германскиот автомобилски концерн Фолксваген објави дека во првата половина од годината продал за петтина возила помалку од истиот период лани, пред се поради намалените испораки во Европа и Кина.
Групацијата VW на тој начин испорача вкупно 3,875 милиони возила ширум светот, што е за 22,2 отсто помалку во споредба со истиот период во 2021 година. Гледано по региони, продажбата паднала најмногу во Централна и Источна Европа, за дури 40,9 отсто во споредба со првите шест месеци од 2021 година. Во Западна Европа е намален за 20,7 отсто, а речиси исто процентуално намалување е забележано и на кинескиот пазар, вклучувајќи го и Хонг Конг, се вели во деловниот извештај на VW.
Испораките на целосно електрични автомобили, од друга страна, се зголемија за 27 отсто, и покрај тесните грла во снабдувањето, привременото прекинување на производството во Европа и исклучувањата во Кина поврзани со Ковид-19. Во периодот од јануари до јуни групата испорача 217.000 електрични автомобили. Во вкупните испораки на ниво на групацијата VW, уделот на целосно електрични возила на тој начин се зголеми на 5,6 отсто, од 3,4 отсто во истиот период од 2021 година. Најголем двигател на растот на продажбата беше Кина, каде беа продадени 63.500 целосно електрични возила, речиси три и пол пати повеќе отколку во првите шест месеци од 2021 година, покажа извештајот на VW.
Во однос на испораките по региони, Европа останува лидер, со 128.800 продадени целосно електрични возила и удел од 59 проценти на ниво на групација. Втор по големина пазар беше Кина, со учество од 29 отсто. Во САД се продадени 17.000 возила, осум отсто од вкупно испорачани ширум светот на ниво на групацијата VW, пренесува деловниот портал SEEbiz. (Р.Н.)