Постапката за продажба на блиндираниот мерцедес е стопирана бидејќи судскиот процес е во тек и кога ќе добиеме допис дека тој повеќе не е предмет на судски процес ќе излеземе со нови информации, изјави денеска портпаролот Миле Бошњаковски одговарајќи на новинарско прашање дали возилото ќе остане за потребите на Владата зашто се користи за превоз на високи странски функционери.
Портпаролот смета тоа не е единственото возило во МВР со безбедносни стандарди за заштита на високи делегации кои престојуваат во Македонија.
По денешната пресуда за „Тенк“ адвокатите на осудените и Обвинителството имаат право во рок од 15 дена да поднесат жалба до Апелациониот Суд. Адвокатите на Груевски најавија дека ќе ја обжалат пресудата. Апелациониот суд може да ја потврди и преиначи висината на затворската казна или да го врати случајот на повторното судење, доколку утврди дека е повредена постапката.
Кон крајот на февруари, Владата одлучи да го стави мерцеседот на лицитација. Почетната цена на наддавањето изнесуваше 14.372.208 денари, односно 230 000 евра. Но, само по неколку дена Владата ја стави во мирување одлуката за продажба на мерцедесот за „никој да не ја искористи оваа постапка за да избегне одговорност во судскиот процес каде ова возило е материјален доказ“.