Денеска во Собранието ќе продолжи 6.седница, на која, меѓу точките на дневен ред е и разрешувањето на јавниот обвинител на Република Македонија, Марко Зврлевски.
Собранието е заглавено на четвртата точка – расправа за одлуката за давање согласност на општите акти на Народниот правобранител, а по формирањето на 10 пратенички групи од ВМРО-ДПМНЕ, неспорно е дека исцрпувањето на точките ќе оди брзо.
Пред завршувањето на седницата вчера во 19 часот, пратеничката група на СДСМ и коалицијата ја напушти салата кога за збор се јави Крсто Мукоски, пратеникот на ВМРО-ДПМНЕ кој на 27.април на т.н. „крвав четврток“, ги отвори вратите на Законодавниот дом за демонстрантите да влезат внатре.
По расправата за актите на Народниот правобранител, треба да уследи расправата за разрешување на јавниот обвинител Зврлевски, но со оглед на големиот број пријавени дискутанти за претходната точка, неизвесно е кога ќе се случи тоа.