Демант на министерот за правда Кренар Лога на изјавата на претседателот на Советот на јавни обвинители Антонио Јолевски, беше заглавјето на соопштението што медиумите претпладнево го добија од Министерството за правда.
Министерот Кренар Лога, кој рече дека се уште не го добил записникот од смената на Весна Дамева, на што му реплицираше претседателот на Советот на јавни обвинители Антонио Јолевски дека нема право на таков увид, денес му врати на Јолевски дека како министер е член на Судскиот совет и може да ѕирне во записникот.
Со денешниот развој на настаните продолжува сагата „Судски совет“ чиј крај се уште не се гледа, а правниот вакуум кој очигледно постои во процедурата за разрешување на претседател на Судски совет, каква всушност не постои, може да доведе до тоа детронизирањето на Дамева да се прогласи за неважечко.
„Изненаден сум од изјавата на претседателот на Советот на јавни обвинители, Антонио Јолевски и не очекував од висок претставник на судската власт кој треба да ги знае Уставот и законите, во јавноста да изјавува дека министерот за правда нема право да го бара записникот од Судскиот совет“, му порача министерот Лога.
Тој тврди дека министерот за правда е член на Судскиот совет по функција и дека редовно добивал покани да присуствува на седниците на највисокото судско тело и дека оттаму добивал извештаи за работењето.
„Членот 15 од Деловникот предвидува дека записникот покрај останатите податоци содржи податоци за дневниот ред што е утврден на седницата, наводите, изјаснувањата и предлозите на присутните на седницата, спроведената расправа, донесените одлуки и резултатот од гласањето. Записникот се разгледува и усвојува на седница на Советот, а по евентуални забелешки, Советот донесува заклучок кој што е составен дел на записникот на кој се однесувала забелешката. Усвоениот записник од седницата на Советот го потпишуваат претседателот на Советот и генералниот секретар, односно лицето што го водело записникот. Судскиот совет има обрска примерок од записникот да достави до членовите на Судскиот совет“, вели тој во реакцијата до Јолевски.
Тој притоа во реакцијата потенцираше дека министерот за правда како член на Судскиот совет има право да реагира и да бара исполнување на обврската за доставување на записник од седница на Судски совет. Рече и дека увидот во записникот „ќе помогне во определување на правецот во кој е потребно да се движат законските измени за отстранување на сите недоследности во функција на обезбедување на владеење на правото и реформи во правосудството“.
Претседателот на Советот на јавни обвинители Антонио Јолевски, кој минатата недела ја стави на тапет обвинителката Ленче Ристоска која важи за еден од најугледните обвинители во државата, му прати порака и на министерот Лога дека нема право да го бара записникот од Судскиот совет.
Според Јолевски, Министерството за правда е извршна власт и не треба да се меша со судската власт.
„Министерството за правда е извршна власт, судската власт е посебна, и тука веќе има мешање на власт. Според мене, министерот за правда нема овластување во делот на судската власт, па дали ќе му биде овозможено или дадено сепак тоа е работа на Судскиот совет“, рече Јолевски.
Состојбите во Судскиот совет повеќе од една седмица го парализираат судството, и доведоа до силни домашни и меѓународни реакции за очигледната некомпетентност и партиски влијанија.
Премиерот Ковачевски реагираше дека настаните поврзани со разрешување на досегашната претседателка на Судскиот совет, Весна Дамева, „не доликуваат на највисокиот орган во правосудството во земјава“.
Тој притоа го поддржа министерот Лога во барањето да го види записникот.
„Го делам мислењето на министерот за правда кој побара во рамки на своите надлежности да го видат во Министерството за правда записникот од самата седница. Она што останува е правосудните органи на ниво кое што е потребно да ја извршуваат својата работа“, рече Ковачевски.
Разрешувањето на Дамева се уште не е објавено во Службен весник, со што одлуката нема статус на официјална, а според некои експертски мислења таа е се уште претседателка додека не се избере нејзин наследник.
С.К.