Ѕидната мурали-уметност во моментов го доживува врвот на својата актуелност во Македонија, благодарение на сè повеќето проекти кои се спроведуваат и им овозможуваат на младите ликовни артисти да ги преточат своите визии во парче ѕидна уметност.
Еден таков проект кој осамна е „Градиме култура, сликаме култура-мурали за 30 години независност“. Во проектот се вклучени повеќе ликовни уметници кои на различни локации и во различни градови ширум Македонија насликаа мурали со личности и настани кои имаат значаен придонес во развојот на културата и историјата на Македонија. Мурали се сликаа во Велес, Кавадарци, Струга, Крива Паланка, Богданци и Кратово.
Па, така Велес доби нов мурал кој преку илустративна визуелизација со цртеж во комбинација со текст ја претставува песната „Ленка“ од Кочо Рацин. Муралот е дело на Бранкица Јордановска, а текстот од песната кој е дел од муралот е изработен од дизајнерот Ласко Џуровски според анализи на оригинални документи со ракописот на Рацин.
Муралот во Кавадарци ги претставува кавадаречките уметници Иван Мазов-Климе, Никола Бадев, Зафир Хаџиманов, Глигор Чемерски, Петар Мазев и Симон Шемов, кои имаа значаен придонес во развојот на државата и создавањето и зачувувањето на културното наследство. Муралот е насликан на фасадата на Домот на културата во Кавадарци, а негови автори се Симона Манчева и Никола Иваноски.
Муралот во Кратово ја претставува Вања Лазарова, синоним за македонската изворна песна и негувателка на фолклорот, родена во кратовското село Страцин. На муралот е претставена и кратовската кула како еден од највпечатливите симболи на градот. Муралот е дело на Ненад Тонкин.
Проектот „Градиме култура, сликаме култура – мурали за 30 години независност“ е поддржан од Владата. Носител на проектот е „Фрагмент Комуникации“, а извршител задолжен за спроведување на уметничката и креативна содржина е „Студио КР7“.
Марија Поповска