Петра Квитова нема да биде во натпреварувачки ритам во наредните шест месеци. Ваква порака испрати хирургот што ја оперира повредената рака на чешката тенисерка по вчерашниот напад во нејзиниот дом во Простејов.
„Кога говориме за потребно време за опоравување за раката да можеда поднесе натпреварувачки притисок, веројатно се работи за шест месеци. Таа е млада и здрава спортистка, но ова, сепак, е релативно сериозна повреда“, рече доктор Радек Кебрле за медиумите во Чешка.
Портпаролот на Квитова, Карел Тејкал претходно истакна дека четиричасовната интервенција минала успешно и таа е во добро расположение. Чешката тенисерка, моментно на 11 позиција на ВТА листата, беше нападната во нејзиниот дом вчераутро пришто се здоби со расекотина на петте прсти на левата рака со која игра, повредени се два нерва и оштетена е тетива.
Полицијата и натаму трага по сторителот кој е опишан како маж на возраст од 35 години. Некои медиуми објавија неофицијален податок дека напаѓачот заминал од домот на Квитова со околу 5.000 чешки круни што во превод значат околу 160 евра.