Шпанецот Унаи Емери повеќе не е менаџер на Арсенал. Тој на „Емирати“ во Лондон пристигна во мај во 2018 година како наследник на легендарниот Арсен Венгер, но доби отказ по 18 месеци работа со „топчиите“ како последица на лошите резултати. Како привремен тренер на екипата е назначен Швеѓанецот Фреди Љунгберг.
Арсенал е во криза и среде низа од седум порази, а последниот го претрпи од Ајнтрахт Франкфурт (1:2) на домашен терен во Лига Европа. Англиските медиуми нотираат дека под водство на Емери, клубот ја бележи најлошата серија од 1992 година.
„Побаравме од Љунгберг да преземе одговорност како привремен менаџер. Веруваме дека ќе успее да нè придвижи напред. Паралелно, трагаме по нов тренер“, изјави Џон Кренке во име на раководството на клубот.
Пред ангажманот во Арсенал, Емери беше на клупата на Алмерија, на Валенсија, на Спартак Москва, на ПСЖ, а најголемиот успех го забележи со Севилја со која трипати ја освојуваше Лига Европа.