Спасувачките екипи пронајдоа тела на 19 жртви од падот на патничкиот авион Ан-26 во Камчатка, објави ТАСС, повикувајќи се на информации од руските служби.
„Спасувачките екипи досега пронајдоа тела на 19 жртви. Може да биде потребно генетско тестирање за да се идентификуваат повеќето од нив. Досега е идентификувано едно лице“, открил извор на агенцијата. Вкупно во авионот имало 28 лица, од кои шест членови на екипажот и две деца. Нема преживеани од несреќата.
Вчера беше објавено дека патнички авион Ан-26 исчезнал од радарите над рускиот полуостров Камчатка на далечниот исток. Авионот на локалната авиокомпанија летал од Петропавловск-Камчатски кон селото Палана кога исчезнал од радарите. Остатоци од авионот подоцна беа пронајдени на брегот, на неколку километри од аеродромот во Палана.
Прогласена е тридневна жалост на територијата на Камчатка поради падот на патничкиот авион. Државните знамиња на Русија и територијата Камчатка ќе бидат спуштени на половина копје од 7 до 9 јули. Од телевизиите и радијата, како и од културните институции, беше побарано да ги откажат забавните програми и настани.