„Врзете ги кучињата, тие се дел од вашата коалиција“, му порача претседателот на Здружението на новинари на Македонија, Насер Селмани, на министерот без ресор задолжен за комуникации, отчетност и транспарентност, Роберт Поповски, кој се појави на протестот на новинарите пред Владата.
Поповски рече дека Владата осудува секаков вид напади врз новинари и има нула толеранција кон заканите. Во вербалното дофрлање меѓу Селмани и Поповски, министерот без ресор неколкупати повтори дека Владата не е единствена институција што треба да го расчисти инцидентот и го повика Обвинителството да ја заврши работата.
Претседателот на ЗНМ, Селмани, рече дека не се плаши од насилниците.
„Не му се плашев на Груевски кога неговите силеџии ми се закануваа. Не се плашам ниту од насилниците на ДУИ. Сега е време да се направи разлика, кој е со насилниците, а кој е за слободна Македонија“, рече Селмани. Тој порача дека Владата мора да ги замолчи насилниците, во спротивно ќе стане дел од таа приказна.
Протестот го организираше Самостојниот синдикат на новинари и медумски работници .
Причината беа заканите упатени кон претседателот на Здружението на новинари, Насер Селмани, од страна на висок партиски функционер на коалициониот партнер во Владата, ДУИ, Бекир Асани и неговиот брат. Во интервју за Мактел, Бекир Асани со погрдни зборови и сексистички го напаѓа претседателот на Здружението на новинари (ЗНМ) Насер Селмани, и го нарекува „копиле” и „дно”.
Бекир Асани е познат по нападот на полицајката Јасмина Јаначковска. Првите информации велеа дека Асани физички ја нападнал Јаначковска. Но таа ова го демантираше и се сликаше со министерот за внатрешни работи Оливер Спасовски и рече дека самата се удрила во “пајакот” кој требал да ја крене лошо паркираната кола на Асани. Најголемиот дел од јавноста остана со убедување дека припадничката на полицијата била под закана за да изјави дека Асани само вербално ја нападнал.
По Фејсбук статус во кој Селмани напиша „Правната држава клекна пред еден силеџија, поддржан од ДУИ“, тој доби закани од братот на Асани.
Вицепремиерот за европски прашања, Бујар Османи денеска ги осуди навредите кои ги упати Асани.
„Наша волја е да создадеме законска рамка за да можат новинарите да ја завршат слободно својата работа, и политичка волја да осудиме и да им помогнеме на новинарите во остварувањето на нивните задачи. Ова го правиме без никакво двоумење или заштита на кој било вклучително и највисок претставник на некоја политичка партија, така да немаме дилема во тој дел“, рече Османи.