Подршшка на жените во Полска поради одлуката целосно да се забарни абортусот денеска дадоа македонските активисти кои излегоа на протест пред амбасадата на Полска во државата. Протестот, наречен „Црн понеделник“ (Black Monday), е во знак на поддршка на Полјачките.
Демонстрантите со себе носеа транспаренти на кои пишува „Мое тело, мој избор“, „Надвор од мојата матка“, „Солидарност“. Активистите транспарентите ги закачија на амбасадата. Со ова тие се приклучија на протестите кои се случија во поавеќе градови во светот.
Поддршка на жените во Полска дадоа и политичарки од опозицијата.
Денеска илјадници жени во Полска не се појавија на работа, тие најавија дека ќе се откажат од работи во домаќинството и ќе апстинираат од секс како протест поради планираните законски измени во земјата за криминализација на сите абортуси.
Жените цел ден беа облечени во црно во знак на одбивањето на предложените измени на законот за абортус, а преку воздржувањето од секакви активности, целта е да ја запрат полската економија.
Доколку стапат на сила новите измени, сите абортуси би биле криминализирани и жените што би абортирале би се соочиле со затворски казни до пет години. Со затвор би се соочувале и медицинските лица кои би го вршеле или помагале абортусот.
Полска и досега имаше еден од најрестриктивните закони за абортус во Европа. Прекинот на бременоста беше дозволен само во рана фаза кога е загрозен животот или здравјето на мајката, кога има веројатност бебето да има трајни последици по здравјето и во случај кога бременоста настапила како последица на силување или инцест.