Под мотото „Кога гасите уметници – го гасите светлото“, Синдикатот на културата на Република Македонија (СКРМ) денеска во 13:00 часот организира голем протест пред Уставниот суд.
Работниците во клултурните институции излегуваат на улица за да го изразат својот револт против поведената постапка за оценување на уставноста на Колективниот договор за култура.
Од Синдикатот алармираат дека ова не е само битка за нивните плати и работни права, туку борба за достоинството на уметноста и слободата на изразување во Македонија.
Од СКРМ порачуваат дека замолчувањето на нивниот глас претставува директен удар врз правдата и иднината на целото општество. Тие сметаат дека секој обид за уривање на колективниот договор е чекор кон маргинализација на културата како фундаментален столб на државата.
„Не постои општество без култура и не постои иднина без уметност. Ако денес молчиме – утре ќе нема кој да зборува“, стои во прогласот на Синдикатот, кој повика на масовност и поддршка од сите граѓани кои веруваат во вредностите на слободната мисла.
Како одговор на зголемените тензии и загриженоста во културниот сектор, Уставниот суд денеска излезе со официјално појаснување. Од Судот нагласуваат дека во оваа фаза се проверува исклучиво усогласеноста на прописите со Уставот, а не се вреднува работата или значењето на уметниците.
Од таму потенцираат дека конечна одлука сè уште не е донесена и апелираат до јавноста објективно да ги следи информациите, нагласувајќи дека уставно-судската контрола се однесува на правниот акт, а не на вработените во културата. Сепак, уметниците остануваат на ставот дека каков било негативен исход од оваа постапка може да има долгорочни и штетни последици по нивниот социјален статус и професионален интегритет.