Протестите иницирани од граѓанското движење „Протестирам“ се прошируваат низ повеќе делови од Македонија. Веќе втора недела се протестира по одлуката на претседателот Ѓорге Иванов за колективна аболиција на 56 лица, а по Скопје, Битола, Велес, Куманово, Струмица и Штип, денеска за прв пат протести ќе се одржат и во Прилеп и Кочани. Исто така, за утре е најавен протестен собир во Охрид, а задутре во Гостивар.
По информацијата дека во петок во Виена ќе се одржи средба со лидерите на четирите најголеми партии во Македонија со европските претставници, „Протестирам“ вчера ги соопшти новите, проширени барања.
– Ние, граѓанките и граѓаните кои во борбата за правда и демократија, здружени протестираме низ улиците на Македонија во име на слободата, правдата и еднаквоста, нагласуваме дека преговори во овие услови се неприфатливи.
Затоа, одлучно продолжуваме со протести и бараме:
– Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО);
– Итна и неотповиклива оставка на Ѓорге Иванов од функцијата Претседател на Република Македонија;
– Произнесување на Уставниот суд за уставноста на СЈО;
– Формирање на специјално одделение на Кривичниот суд, кое ќе биде надлежно за случаите под јурисдикција на СЈО;
– Итно повлекување на одлуката за одржување на парламентарни избори на 5 јуни;
– Задолжително вклучување и присуство на независни претставници на граѓанското општество во процесот на решавање на кризата;
– Формирање на преодна влада која докрај ќе ги имплементира итните реформски приоритети од извештајот на Прибе.
Дотогаш, нашата политичка борба останува на улиците. Нема правда, нема мир!“, велат од „Протестирам“.