Софија: Илјадници граѓани излегоа на улиците на Софија барајќи „фер и чесни избори“ и целосна транспарентност при броењето на гласовите, со помош на специјализирани скенери.
Опозиционерите предупредуваат дека амандманот е предложен во непосредна близина на изборите и создава ризик од манипулации. „Не постои доволно време за купување, конфигурирање и лиценцирање на новите уреди, што значи дека гласањето практично ќе се спроведува со хартиени ливчиња, со сите ризици од изборни злоупотреби“, порачаа од организаторите.
Протестите доаѓаат во момент кога Бугарија е заробена во институционална криза по оставката на владата во декември. Парламентот сè уште не успеа да формира ново мнозинство, а двете најголеми парламентарни групи веќе се откажаа од мандатите за состав на кабинетот. Следниот чекор е претседателот да додели трет мандат на една од преостанатите групи, но ако и тој обид не успее, се очекува да биде назначена привремена влада.