Најмалку 22 лица загина изминативе денови за време на протести на опозицијата во Судан, соопшти денеска опозицискиот лидер Садик ал Махди.
„Протестите се причина за смрт на 22 маченици, а многумина се повредени“, изјави Ал Махди.
Меѓутоа, според суданските власти, во „судирите меѓу силите за справување со немири и демонстрантите“ загинале најмалку осум лица.
Според Махди, протестите започнале во средата по одлуката на властите за поскапување на лебот од една на три судански фунти (од две на шест центи).
Махди е поранешен судански премиер кој раководеше со последната цивилна Влада во земјата. Од власт беше соборен во 1989 година од актуелниот шеф на државата, Омар ал Башир.
Судан се соочува со сериозни економски проблеми и инфлација што достигнува околу 70 проценти.