Петти ден по ред граѓаните масовно излегуваат на протест по одлуката на претседателот за колективна аболиција на 56 лица, меѓу кои високи функционери од власта. Тие бараат оставка од претседателот и целокупната власт, како и одговорност за криминалите без никаква амнестија. Според демонстрантите неопходно е формирање на експертска влада и одложување на изборите се додека не се создадат услови тие да бидат фер и регуларни.
-Јасно е дека сме гневни, јасно е дека сме на вистинската страна на историјата и тука треба да останеме. Вакви големи криминали, историјата покажала дека не остануваат незабележани, така што треба да останеме до нашето и да се оди до крај, вели демонстрант.
Протестот започна пред Специјалното обвинителство каде што повторно граѓаните изразија поддршка на обвинителите, а оттаму колоната продолжи пред Собрание. Оттаму, откако повторно беше бојадисана Триумфалната порта, колоната демонстранти продолжи кон Владата, а потоа и кон штабот на ВМРО-ДПМНЕ. Протестот беше дозволен пред сите објекти, но не и пред штабот на ВМРО-ДПМНЕ. Таму засилен кордон од специјалци не дозволуваше да се продолжи до зградата, по што демонстрантите околу 22 часот се разотидоа. Вечерва се протестираше и во Струмица и во Битола.