Граѓаните на Унгарија излегоа на избори во голем број, што беше само по себе знак дека конзервативниот премиер Виктор Орбан ќе однесе уште една победа и ќе освои четврти по ред мандат.
Според првите проекции Орбан и натаму ќе ја предводи Унгарија. Првичните резултати покажуваат дека национално-конзервативната граѓанска алијанса на премиерот Виктор Орбан, позната под името Фидес, може да се надева на 121 место во парламентот, додека опозицијата би освоила 77 места.
Тоа би значело прилично убедлива победа за Орбан, но сепак не двотретинска победа.
На изборите им претходеа разместувања во опозицискиот блок кои резултираа со сојуз на шест политички партии со амбиции да го соборат 58-годишниот Орбан. Опозициската коалиција беше предводена од Петер Марки- Зеј.
Избирачките места беа затворени во 19 часот и она што првично се знае е дека излезноста на половина час пред затворањето на гласачките кутии била 67,8 отсто што е бројка слична на одзивот на гласањето на минатите избори во 2018 година.
Орбан и неговата сопруга Анико Леваи гласаа рано наутро во училиште во предградието на Будимпешта, најавувајќи „голема победа“.
Гласањето се одржа под огромен надзор на меѓународни набљудувачи, дури над 200. Илјадници доброволни посматрачи распоредија и владејачката Фидес и опозицискиот сојуз.
Прелиминарните резултати се очекуваат за доцна вечерва.