Португалија денеска ги регистрира првите два случаја на коронавирус на своја територија. Еден од заразените неодамна патувал во Италија, а другиот се вратил од Шпанија. Двајцата се примени во болница во Порто.
Првите три случаи на Ковид-19 се потврдени и на Исланд, соопшти доцна синоќа исландската Служба за цивилна заштита и справување со кризи. Тројцата заразени биле на одмор во Италија.
Дваесет годишно момче, кое било во посета во Милано, е првиот случај на заразено лице со коронавирус во Андора, соопштија локалните властите.
Прв случај на коронавирус е регистриран денеска и во Рим. Станува збор за полицаец, кој претходно престојувал во регионот Ломбардија, пишуваат тамошните медиуми.
Индиските власти соопштија денеска за нови два случаја на коронавирус, со што вкупниот број на заразени во Индија изнесува пет лица.