Телевизија „Канал 5“ излезе со соопштение во кое потврдува дека главниот и одговорен уредник Гоце Михајлоски е заболениот новинар со ковид-19 кој во изминатиот период беше домаќин во „Само Интервју“ на лидерите на СДСМ и на ВМРО-ДПМНЕ, Зоран Заев (2 април) и Христијан Мицкоски (3 април). Двајцата, како што кажа министерот за здравство Венко Филипче, од денеска се наоѓаат во изолација во домашни услови, иако тестот на Мицкоски е негативен, а за Заев се очекуваат резултати во текот на денот.
Во соопштението на „Канал 5“ се наведува дека Михајлоски пројавил први симптоми во неделата, на 5 април, во форма на главоболка, малаксаност и замор по што веднаш го напуштил работното место. Првиот тест го направил во приватна клиника на 7 април и покажал негативен резултат за два дена подоцна да биде хоспитализиран во ГОБ „8 септември“, а утрово да стигне информација дека, сепак, е носител на коронавирусот.
„Викендот на 28 и 29 март оваа година, колегата Михајлоски бил во посета на своте родители во Прилеп, од каде во понеделникот, на 30 март, продолжува со работа во дневно-информативната редакција, без никакви елементарни сомнежи, ниту симптоми. Во четвртокот и петокот, во емисијата „Само интервју“, гости му беа Зоран Заев и Христијан Мицкоски, последователно, при што беа запазени сите протоколи. Првите симптоми кај колегата Михајлоски се појавиле во неделата, 5 aприл, кои биле во форма на малаксаност, замор и главоболка, по што околу 17 часот го напуштил работното место“, се вели во соопштението на ТВ „Канал 5“.
Михајлоски, како што се наведува во дописот, од 6 април бил во самоизолација и во меѓувреме добил и температура повисока од 38 степени. Од телевизијата тврдат дека преку матичен лекар се обидел да добие упат за тестирање, но при епидемиолошката анкета не покажал доволно симптоми.
„На 7 април, во утринските часови, поради зголемена температура, прави тест преку крв во една приватна болница, кој покажува дека е негативен на коронавирусот. Во четврток, 9 април, колегата Михајловски заминува во градската болница „8 септември“, каде е примен, а утринава нè информираше дека, сепак, е позитивен на ковид-19“, велат од телевизијата посочувајќи дека во соработка со Министерството за здравство ќе ги преземат сите чекори за надминување на „несреќната здравствена состојба“.
Од „Канал 5“ информираат дека подолг период имаат воспоставено високи стандарди на заштита и контрола на вработените во телевизијата, како што се: задолжително мерење на телесна температура при влез во компанијата, дезинфекциски пунктови на пет локации, односно на секој кат, дополнително и во информативната редакција. Задолжително, велат, работниот процес се извршува со помош на заштитни маски, за делот на техниката и новинарите се обезбедени и пластични визири, за дополнитена заштита, а новинарите за кои е можно тоа, посочуваат, работат од дома.