Денеска во Основниот суд Скопје 1 треба да се одржи првото рочиште за случајот „Поткуп“, предмет во кој лидерот на СДСМ, Зоран Заев, во својство на градоначалник на Струмица е обвинет дека наводно побарал поткуп од струмички бизнисмен за приватизација на земјиште.
Последен пат, судењето беше одложено на 22 септември поради службено патување на Заев.
Судијката Дијана Груевска-Илиевска тогаш соопшти дека на 12 септември примиле известување од бранителот на Заев дека Заев ќе отсуствува бидејќи е на службено патување во Тирана каде што учествува на состанокот за мониторинг на Парламентарното собрание на Советот на Европа.
На рочиштето не присуствуваше ниту бранителот на Заев Филип Медарски ниту сведокот Иван Николов.
Според Обвинителството, Заев во својство на градоначалник на Струмица, од струмичкиот бизнисмен Иван Николов, побарал поткуп од 163.924 евра, односно по 2 евра за еден метар квадратен градежно земјиште во Струмица, за кое Николов бил заинтересиран да го приватизира.
Според обвинението, една половина од парите требале да бидат за Заев, а другата за изградба на црква во Струмица.