Првото утро во месец април е со снежна покривка од 16 сантиметри во Дебар, на Попова Шапка има наврнато 15 сантиметри снег, во Крушево – 14, во Маврово и во Пожаране – 11. Осум сантиметри снег се измерени во Лазарополе и во Ѓуриште, седум во Прилеп, шест во Битола, пет во Тетово и по три во Скопје-Зајчев рид и Штип.
Во Маврово утрово се измерени минус осум степени, во Лазарополе и во Крушево минус четири, минус два во Прилеп, минус еден беше во Крива Паланка, во Тетово, во Скопје-Зајчев Рид.
Управата за хидрометеоролошки работи најави дека времето денеска ќе биде облачно со врнежи од снег, а само во долниот тек на Повардарието ќе бидат од дожд и снег. На повеќе места количината на наврнет воден талог ќе биде над 25 литри на метар квадратен, а најмногу врнежи ќе има во јужните делови.
Снежна покривка ќе се формира во, речиси, целата земја, на пониските места ќе биде над 10 сантиметри, во Пелагонија околу 20 сантиметри, а на планините и повеќе. Ќе дува слаб до умерен ветар од североисточен правец. Максималната температура ќе биде во интервал од нула до пет степени.
Во Скопје ќе биде облачно со врнежи од снег во текот на целиот ден и во вечерните часови, при што ќе се формира снежна покривка. Ќе дува слаб до умерен североисточен ветер. Максималната температура ќе достигне до еден степен.