Претседателот на каталонската регионална Влада, Карлес Пуџдемонт на 23 октомври ќе прогласи независност на Каталонија, објави весникот „Конфиденсиал“.
Според весникот, засега не е познато како властите во Барселона ќе го изведат прогласувањето независност, но не е исклучена можноста тоа да биде сторено на седница на каталонскиот Парламент, свикана по итна постапка.
Весникот нагласува дека на овој начин Барселона сака да прогласи независност пред одржувањето на седницата на шпанскиот Сенат најавена за в петок, на која треба да бидат одобрени мерките на Владата во Мадрид за распуштање на регионалните власти во Каталонија и за распишување на избори во регионот.
Вчера, премиерот на Шпанија Марано Рахој одржа вонреден состанок со своите министри и најави активирање на членот 155 од уставот на Шпанија, кој и овозможува на централната власт да ја презеде контролата над која било од 17 автономни покраини, доколку некоја од нив не се однесува во согласност со шпанскиот Устав.
„Главна цел на ваквите мерки е враќање на владеењето на правото бидејќи не може да постои ниту еден дел од државата каде што не се применува правото, каде што тоа не постои. Во исто време мораме да ги вратиме институциите во нормала“, рече Рахој.
По оваа одлука на Рахој, половина милион граѓани излегоа на протест на улиците на Барселона, а Пуџдемонт рече дека нема да го прифатат планот на Мадрид со кој сака да ги одземе моќите на регионот.