На Европа сè уште ѝ е потребна американската моќ за евентуална голема војна, но европските сојузници стануваат сè поподготвени самостојно и агресивно да возвратат во „сивата зона“.
Newsweek
„НАТО од кое Путин треба да се плаши е она што Америка повеќе не го контролира“ (The NATO Putin Should Fear Is One America No Longer Controls) е насловот на анализата потпишана од уредниците на Newsweek, објавена на 28 мај.
Според уредниците на престижниот американски неделник, Владимир Путин со години успешно ја користи стратегијата на „сивата зона“ против НАТО. Ова подразбира непријателски дејствија кои остануваат под прагот на отворена војна и не го активираат Членот 5 од повелбата на Алијансата. Операциите што ги спроведува Кремљ вклучуваат саботажи, сајбер-напади, упади на дронови и попречување на ГПС сигналите – каков што беше неодамнешниот повеќечасовен инцидент над Балтикот со авионот на британскиот министер за одбрана, Џон Хили.
Долго време, одговорот на НАТО на хибридните закани беше внимателно и бавно калибриран токму во Вашингтон. Соединетите Американски Држави традиционално го претставуваат главниот воен столб на Алијансата, но истовремено служат и како нејзина клучна „кочница“ против ескалација.
Меѓутоа, поради несигурноста на американската посветеност во ерата на Доналд Трамп, оваа динамика драстично се менува. Државите од првата линија во Европа, кои се директно изложени на руските закани, го губат трпението. Земјите како Полска (која во 2025 година одвои дури 4,48% од својот БДП за одбрана), Чешка и балтичките држави повеќе не сакаат да чекаат консензус управуван од Вашингтон пред да реагираат. Европските лидери сè погласно бараат НАТО да ги „покаже забите“, предлагајќи порешителни, па дури и асиметрични одговори против Москва – вклучително сајбер-одмазда, санкции или соборување на летала кои го нарушуваат сојузничкиот воздушен простор.
Иако Путин со години се обидуваше да го ослабне американското влијание во НАТО, новиот облик на Алијансата може да се покаже како многу понепредвидлив за Кремљ.
На Европа сè уште ѝ е потребна американската моќ за евентуална голема војна, но европските сојузници стануваат сè поподготвени самостојно и агресивно да возвратат во „сивата зона“.
Ако Европа заклучи дека американската кочница за ескалација повеќе не функционира, рускиот претседател може да се соочи со жестока повратна реакција, докажувајќи дека вистинската опасност за Русија никогаш не бил само Членот 5, туку токму просторот непосредно под него.
Текстот е сопственост на: Newsweek