Бугарија е многу загрижена од ескалацијата во Македонија во врска со договорот за новото име на државата, рече бугарскиот претседател Румен Радев на денешната прес-конференција во Софија по средбата со македонскиот претседател Ѓорге Иванов.
Радев го повика Иванов да не биде само учесник, туку и водач во дијалогот меѓу институциите во Република Македонија, бидејќи, како што истакна, тоа е важен услов за постигнување на стратешките приоритети – членство во ЕУ и НАТО.
-Разговаравме за ова прашање и ги поздравуваме напорите за решавање на овој случај, ова е важен чекор за Македонија, кој ние го поддржуваме. Сфаќаме дека ова е сложен процес и за Македонија и за Грција. Исто така е важно и за Бугарија. Кога станува збор за ова прашање, треба да биде јасно дека ниту една наша власт не е заинтересирана за името. Ги прифаќаме резултатите од преговорите меѓу Грција и Македонија за името, особено доколку ги отстранат важните пречки на патот кон процесот на интеграција на Македонија. Главното ветување за нашата поддршка за името на Македонија е строгото исполнување на договорите со нас, рече Радев.
-Се осмелувам да кажам дека Бугарија е земја која најсилно го поддржува евроатлантскиот пат на Македонија. Треба да биде јасно дека Бугарија има доследна политика од 1991 година. Тоа го препотврдивме и со договорот од 2017 година, особено член 11, во кој се вели дека двете земји не треба да имаат територијални претензии , истакна Радев кој оцени дека Договорот веќе ги дава своите резултати, посочувајќи ги статистиките за растот на стоковната размена, инвестициите во економијата, туризмот, кои според него се охрабрувачки.
На новинарско прашање до претседателот Иванов, да објасни зошто ја напуштил средбата со Заев и Димитров вчера, тој одговори:
-Никого не сум избркал, не шпекулирајте. Немаше ништо за што би можел да разговарам за овој документ, во кој не учествував. Како што го донесоа, така нека го завршат. Тоа е нивна одговорност, одговори Иванов.
Шефот на македонската држава Ѓорге Иванов кој е во Софија требаше да се сретне и со бугарскиот премиер Бојко Борисов и бугарската министерката за надворешни работи Екатерина Захариева, но средбите се откажани.
– Не сакаме да се мешаме во внатрешните работи на нашиот сосед. Нашата позиција е принципиелна и јасна, како и на целата меѓународна заедница. Јасна е и позицијата на претседателот на Македонија. Бугарската Влада не гледа причина да биде искористена за внатрешно-политички дебати во Скопје. Клучно за идниот развој на нашата соседна држава е интеграцијата во ЕУ и НАТО и тоа да не се доведува во прашање, се наведува во соопштението од Владата на Бугарија.
-Бојко Борисов е премиер на земја која претседателствува со ЕУ, и тој зборува за дијалог. Но, со овој гест тој учествува и не ја разбира главната цел на претседателствувањето, изјави Иванов.