Скоро 40 години се занимавам со музика, со продуцирање на музички спотови и музика за филмови, а со Бојан Јовановски и неговото семејство се познаваме околу 15 години. Со Бојан нè поврзуваше уште една работа, а тоа е отворањето на телевизијата“, рече Александар Радуловиќ, сопруг на познатиот српски текстописец, Марина Туцаковиќ, кој е последен сведок по предлог на првообвинетиот во случајот „Рекет“, Бојан Јовановски.
„Неговата телевизија, според мене, беше многу интересен проект кој можеше да вроди квалитетна соработка. Решив дека треба да му помогнам во финансирањето за отворање на теливизијата. Секако дека му помагав и приватно кога му било потребно, бидејќи бевме многу блиски пријатели“, рече Радуловиќ на денешното рочиште во судницата во Кривичнуиот суд во Скопје.
Радуловиќ притоа потенцира дека Јовановски и неговото семејство честопати патувале заедно во Грција, во Италија, заеднички прославувале родендени, дочеци на Нова година, куќни слави. За време на рочиштето беше презентиран и материјал на це-де кој, според него, го снимал Јовановски во Србија.
„Лани со Бојан се видовме околу Нова година, а се видовме во февруари и кај нас во ателјето една недела пред роденденот на мојот син“, сведочеше Радуловиќ.
Сведокот Лидија Јаневска која требаше да сведочи на денешното рочиште доставила медицинска документација дека е под стрес и не може да сведочи.
Пред почетокот на судењето, судијката Васка Николовска – Масевска, ги предупреди присутните да не се однесуваат недолично, алудирајќи на обвинетите, одбраната и обвинителката Вилма Рускоска.
„До сега бев толерантна кон сите вас и ве оставав да се доискажете сите во своето излагање. Веќе нема да ве толерирам и нема да дозволам да се однесувате недолично во оваа судница. На следното такво однесување ќе бидам приморана да ве отстранам од судницата. Сите недолични зборови задржете си ги за надвор од оваа судница“, рече судијката.
Првообвинетиот Јовановски се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Катица Јанева се товари дека сторила кривично дело „злоупотреба на службена положба и овластување“.