Данска и Германија им фрлија ракавица на Македонија и на Шпанија на Европското ракометно првенство во Хрватска. Двете селекции со победи ги продолжија настапите на 13. континентален турнир и ги истиснаа „црвено-жолтите“ од лидерската позиција во групата 2 во Вараждин.
Данците вечерва ја поразија Словенија со 31:28 (полувреме 16:14) и избија на првото место на табелата. Сван беше најефикасен играч на натпреварот со 11 гола, во победничката репрезентација со шест гола се истакна и Мортенсен колку што постигна и Зарабец за составот на Веселин Вујовиќ. Пет запиша Јанц, а Мацковшек со четири погодоци беше трет стрелец кај „змајчеки“ кои остануваат на единствениот бод што го пренесоа од Загреб.
Германците, пак, дури во последните десет минути го скршија отпорот на Чешка за конечни 22:19 (полувреме 9:10). Фат со осум гола беше предводник на европскиот првак против жилавите Чеси чиј лидер беше Чип со шест гола, по четири реализираа Кашпарек и Здрахала.
Мечевите во Вараждин продолжуваат во недела. Во попладневниот термин (18,15 ч.) ќе се судрат Германија и Данска, а во вечерниот (20,30 ч.) и дуелот на „црвено-жолтите“ селекции во групата – Македонија и Шпанија.
ЕП во ракомет
Група 2 (Вараждин), 3 коло
Словенија – Данска 28:31
Германија – Чешка 22:19
Табела: Данска 4, Германија 4, Македонија 3 (-1), Шпанија 2 (-1), Чешка 2, Словенија 1.
Двојки за 4. коло: Германија – Данска (18,15 ч.), Македонија – Шпанија (20,30 ч.)
Утре на ЕП
Група 1, 4 коло
Шведска – Франција (18,15 ч.)
Хрватска – Норвешка (20,30 ч.)
Табела: Норвешка 4, Шведска 4 (-1), Хрватска 4, Франција 4 (-1), Белорусија 0, Србија 0.