Победа и два бода е единствената мисла кај ракометарките на Вардар попладнево (15 ч.) во Астрахан, Русија, во дуелот со домашната Астраханочка во натпревар од третото коло во Б групата во Лигата на шампиони. „Црвено-црните“ се без Лекиќ и Суслина, но нивните отсуства нема да влијаат во намерата да останат со кренати глави и високо подигнати раце во спортскиот центар „Звездни“ за задржување на првото место во групата.
Вардарки имаат неочекувано реми со ФТЦ на стартот и убедлива победа над Лајпциг во второто коло. Играта и резултатот со германскиот претставник во групата дојде како „ветар во грб“ за македонскиот женски првак пред ова гостување, прво во сезоната. Самодовербата е крената, но внимателноста е, сепак, присутна бидејќи на спротивната страна е шампион на Русија кој заслужува респект без разлика во каква состојба се наоѓа. Загуби во Будимпешта меѓутоа, претходно, го совлада Лајпциг на домашен терен што впрочем ќе биде голем адут за составот на Андреевич од кој заминаа неколку ракометарки и тренерот Трефилов.
„Вардар е Вардар. Покажавме одредени слабости во првиот меч со Ференцварош што го завршивме со реми, се поправивме против Лајпциг. Одигравме според договорот и ги освоивме бодовите. Ако и денеска биде така и насоките што ги имаме ги спроведеме на терен, ние ќе бидеме тие што на крајот ќе се радуваме. Имаме респект кон Астраханочка, но фокусирани сме на нашата сметка, а таа се однесува на победа“, вели десното крило Радичевиќ.
Во втората половина од оваа фаза во ЛШ, ЖРК Вардар го очекува еден настап на домашен терен и уште две гостувања. Најпрво е реваншот со Астраханочка на 5 ноември во Скопје по што ќе следува патување во Германија во претпоследното коло (13 ноември) и во Унгарија во последното каде се очекува низ директен дуел со Ференцварош (19 ноември) да се одлучува победникот во групата Б.