Македонија ја има и втора селекција што оваа година ќе игра на Светско ракометно првенство. Ова се однесува на младинската која ја декалсира Турција со 39:19 (полувреме 22:13) во последниот меч на квалификацискиот турнир во Скопје. По вчерашното реми со Португалија (21:21) и денешната нејзина победа над Полска со 34:21 (18:13), на избраниците на Илија Темелковски им беше потребен триумф со 19 гола разлика за прво место во групата и пласман на завршниот турнир. Разликата за мундијал, „надежите“ ја достигнаа во 48 минута (34:15) и до крајот не дозволија да биде нарушена нивната забава.
Голманите и денеска беа на висина на задачата. Особено ова важи за Даниловски од Пелистер кој меччот го заврши со 14 интервенции. Најистакнат во поле беше Мице Шилегов со 10 гола, Филип Талески реализира девет, Палевски учествуваше со седум. Предвоници во турската репрезентација беа Озтурк и Озал кои дадоа по пет гола.
Светското првенство во Алжир е од 17 до 30 јули оваа година. Македонија е шестата европска селекција со мундијалска виза по Франција, Норвешка, Шпанија, Хрватска и Исланд, земји кои беа од првото до петтото место на ланското ЕП за ракометари до 20 години.