Драги Рашковски, поранешниот генерален секретар на Владата обвинет за злоупотреба на службената положба и за перење пари во судскиот предмет „Софтвери“ денеска на рочиште во Кривичниот суд во Скопје се изјани дека не е виновен за делато за кои е обвинет, а обвинителниот акт го нарече оксиморон.
На прашање на судот дали го разбира обвинението и дали се чувствува виновен Рашковски одговори:
„Семантички ми е јасно обвинението, но како правен акт не. Апсолутно не се чувствувам виновен“, рече обвинетиот Рашковски, откако обвинителката Вилма Русковска го презентираше обвинението во кое се опфатени и уште шестмина обвинети.
Обвинителката Русковска, пак, рече дека во постапката Обвинителството ќе изнесе докази со кои ќе го увери судот дека обвинетиот Драги Рашковски нерационално и непродуктивно ги трошел народните пари и дека ја злоупотребил положбата за свои лични материјални цели, а дека софтверот не е употреблив не само поради спорната јавна набавка која е предмет на обвинителниот акт, туку и и дека е нефункционален.
Рашковски, пак, обвинението на обвинителката за гонење организиран криминал го оцени како оксиморон и додаде дека тој и обвинетите намерно биле држени во притвор, за да во јавноста во тоа време се создаде впечаток дека се сторени кривични дела кои не се кривични дела изразуваќи се метафорички:
– Тоа ви е како да барате црна мачка во темна просторија или мачка која ја нема.. За обвинението постои еден израз оксиморон, тоа вие како да кажете паметна будала, рече Рашковски додавајќи дека во судскиот процес тој и неговата одбрана ќе докажат преку материјални и вербални докази дека кривичните дела кои му се ставаат на товар не постојат.
Ексгенералниот секретар на Владата е обвинет и дека од јуни 2017 до почетокот на мај 2021 година пуштил во оптек 5. 378 319 денари (87. 500 евра), а за кои оттаму тврдат дека потекнуваат од кривично дело. Со парите, според Обвинителството, тој вршел уплати на сметките на членови на семејството, а предвреме отплатил и кредит.
Првообвинетиот, се вели во oбвинителниот акт, не ги извршил своите службени должности при спроведување на четири постапки за јавна набавка за Систем за биометриска идентификација, јавна набавка на Софтвер за определување на просечна брзина на возила во сообраќајот и изрекување на казни, набавка на стоки – ANPR камери за препознавање регистарски таблички за возила и јавна набавка на работи – метални кабини за потребите на системот на биометриска идентификација и систем за автоматско препознавање на регистарски таблици.
С.М.