Уште еднаш потенцираме дека и покрај опструкциите и неодговорното однесување на Акционерското друштво за стопанисување со станбен и деловен простор (АДССДП) за време на мандатот на претходната Влада, ќе ги вложиме сите напори за натпреварот да се одржи на „Телеком арената“ во Скопје, a очите на светската спортска јавност да бидат вперени кон Македонија, реагираше Генералниот секретар на Владата, Драги Рашковски по демантите кои вчера ги упатија АДССДП и фирмата „Атриум“.
„Иако фирмата Атриум реагира, Мукоски нема да може да го скрие Договорот за ангажирање за варосување на ѕидовите на Стадионот кој ги содржи сите детали за кои информиравме на денешната прес конференција. Со реакцијата на Мукоски само се потврдува нивната вклученост, но и одговорноста која надлежните ја имале за преземените обврски наспроти исплатената цена. Атриум не може да се повикува на никаква итност во постапката, зашто забелешките на УЕФА до ФФМ прв пат стигнале уште во септември 2015 година, односно пред речиси две години. Последните забелешки испратени од УЕФА до ФФМ на адреса на Владата се пристигнати и заверени во архивата на Владата на 22 јуни 2017, што е седум дена, а не седум минути после датумот на кој УЕФА изреагирала до ФФМ“, пишува во реакцијата на Рашковски.
Во соопштението се вели дека УЕФА Супер купот е сериозен, историски настан за спортската јавност во Македонија и светот и заради тоа ни една институција, организација или компанија не смеела и не смее да се однесува неодговорно и непрофесионално при ваква алармантна состојба.