Поранешниот генерален секретар на Владата, Драги Рашковски,откако беше одложено денешното рочиште во случајот за кој е обвинет поради незаконска набавка на софтвер за МВР и перење пари обвини дека обвинителката која го застапува обвинението му импутирала смс пораки кои ги прикажува како докази. Тој во изјава пред Кривичниот суд во Скопје рече дека во текот на судскиот процес  ќе докаже дека станува збор за апсурдни податоци и дека обвинителката сама ги куцала пораките затоа што открил дека во една секунда биле искуцани дури 43 смс пораки.

– Гинисовиот рекорд е во 50 секунди да искуцате една порака, а не 43 во една секунда. Холивуд да го режира ова, нема да може да го направи – рече Рашковски и најави дека ќе достави и нови докази дека нема вина во неговото постапување, а додаде дека во случајов за сведок ќе го повика и поранешниот министер за внтарешни работи Наќе Чулев. Рашковски му забележува на обвинителството оти му импутира дека на неговата сметка биле уплатени пари во 2015 година за наводен тендер кој бил распишан во 2019 година.

– Во 2015 година јас не бев функционер и не може тие пари од тогаш да бидат за кривично дело од 2019 година – додаде Рашковски кој смета дека има многу недостатоци во прибирањето дигитални докази од страна на Обвинителството за гонење организиран криминал поради што е и поднесена жалба до Апелацискиот суд која е една од причините за одложување на денешното рочиште.

Рашковски пред новинарите одговори и за хациендата во Побожје тврдејќи дека таму има само плац кој го купил со сопствени пари.Тој се повика и на анкетниот лист за кој рече дека нема промени, откако станал функционер, освен во делот на подароците за децата кои ги добиле на родендени, како и во делот на недвижностите кои тој им ги препишал. Од друга страна пак, обвинителката Ивана Трајчева најави дека Обвинителството има докази со кои во текот на судскиот процес ќе ги докаже наводите во обвинителниот акт. На прашање на новинарите да каже кои се сведоците на Обвинителството во процесот, Трајчева засега одби да ги открие.

– Листата на докази е навистина обемна. Јас не би можела сега да ви ја кажам, да ви ја набројам бидејќи станува збор за многу докази. Можам да ви кажам накратко дека во суштина станува збор за докази од кои ќе се докажат сите факти што се наведени во диспозитивот на обвинителниот акт за секоја постапка посебно, како и за хонорарците, а и за кривичното дело „перење пари“, изјави обвинителката Трајчева.

Според Обвинителството Рашковски и уште шест лица сториле злоупотреба на службената положба и овластување и переле пари при спроведување на четири постапки за јавна набавка за Систем за биометриска идентификација, софтвер за определување на просечна брзина на возила во сообраќајот и јавни набавки на камери и опрема за препознавање на регистарски таблички.

Обвинителството смета дека Рашковски во периодот од јуни 2017 година до февруари 2021 година, со умисла, помогнат од двајца надворешни соработници, ги извршил кривичните дела.

„Тој не ги извршил своите службени должности при спроведување на четири постапки за јавна набавка за Систем за биометриска идентификација, јавна набавка на Софтвер за определување на просечна брзина на возила во сообраќајот и изрекување на казни, набавка на стоки – ANPR камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици“, велат од Обвинителството.

(С.М.)