Тројца се под истрагата поради сомнение дека се дел од разоткриена шема за криумчарење луксузни автомобили од Бугарија, меѓу кои „тојота ЦХР“ вредна 22.500 евра, „лексус НХ300Х“, вреден 15.000 евра и „ланд ровер – рејнџ ровер евок“, вреден 17.340 евра. За тројцата обвинител до судот предложил мерка притвор. Едниот од осомничените е надвор од државата, со што е предложено притворот да започне откако лицето ќе биде лишено од слобода, соопшти Основното јавно обвинителство.
Дел од учесниците во оваа шема се претходно обвинети, против дел од нив се веќе изречени пресуди, а за дел кривичниот прогон е препуштен на Бугарија, бидејќи станува збор за тамошни државјани.
Со акцијата реализирана вчера под координација на јавен оибвинител, се обезбедија докази кои даваат основано сомнение дека првиот новоосомничен, во март 2022 година, преку граничниот премин Деве Баир, поттикнал и организирал криумчарење на автомобил „тојота ЦХР“, вреден 22.500 евра, кој бил предмет на меѓународна потрага. Притоа искористил лажни таблички и лажни исправи кои му биле изготвени од лице кое сега е веќе осудено, па го регистрирал и извадил сообраќајна дозвола за возилото, соопшти ОЈО Скопје.
Втората осомничена, во август 2021 година поттикнала двајца бугарски државјани да извршат криумчарење на „лексус НХ300Х“, вреден 15.000 евра кој исто така бил предмет на меѓународна потрага. Автомобилот го презела осомничената со фиктивен договор за купопродажба, а потоа со лажни бугарски таблички и лажни исправи извадил сообраќајна дозвола во земјава.
Третиот осомничен е управител на правно лице, кој за потребите на фирмата, на сличен начин, избегнувајќи ја царинската контрола, во државава од Бугарија внел автомобил „ланд ровер – рејнџ ровер евок“, вреден 17.340 евра, со преправен број на шасија, а потоа со целосно лажни документи извадил сообраќајна дозвола за возилото.
Под сомненија за кривично дело „Фалсификување службена исправа“ постапка е поведена и против две службени лица кои во времето на извршување на дејствијата биле вработени во управните служби на МВР и за кои постојат сомненија дека ги изготвиле и ги издале сообраќајните дозволи, информира Обвинителството.