Екс директорот на Агенцијата за туризам, Александар Донев денеска преку Фејсбук за првпат се огласи по неговото разрешување од 30 јануари. На неговиот Фејсбук профил, тој меѓудругото, обвинува дека нема време да ги реализира процесите што ги започнал во Агенцијата и како што вели, борбата да ја доведе во ред, со таква „институционална поставеност и политички контекст“, како и за „сервилен популизам… за да се заситат гладните за сеир и жртва, додека вистинските проблеми остануваат скриени“.
„Најпрво благодарност за поддршката на оние кои ја искажаа и кои ме познаваат доволно да знаат дека тоа што го правам со години како и изминативе шест месеци го правам искрено и од срце и со една намера а тоа е да помогнам на Македонија на начин на кој најдобро знам и умеам.
Најпрво како гласен критичар и борец против режимот, а последниве неколку месеци и како директор на Агенцијата за промоција и поддршка на туризмот. Улога навидум многу слична со полето на мојата експертиза и она што професионално го работам со години но и многу различна поради тоа што е државна институција, нешто што е тешко да се опише на некој што од блиску немал можност да го запознае ова “чудовиште” или слободно можам да кажам ракот на нашата држава.
Сметам дека сега не е ниту време ниту место да зборам за што се случуваше овие неколку месеци, процесите кои ги започнав, а немав време да ги реализирам и борбата што ја имав за да ја доведам во ред агенцијата и колку тоа е можно со ваква институционална поставеност и во ваков политички контекст. Ќе го направам тоа во иднина – ветувам.
Сега би сакал само да апелирам да не верувате на секакви глупости што читате по некои медиуми и секако да прочитате и нешто повеќе од насловот.
Не верувајте во сервираниот популизам и не ги глодајте коските фрлени за да се заситат гладните за сеир и жртва додека вистинските проблеми остануваат скриени.
Годишната програма за работата на агенцијата беше изгласана на истата седницата на влада на која бев разрешен. Иако не се согласувам со причината за моето разрешување (ќе аргументирам во блиска иднина зашто), јас ја почитувам одлуката на Владата.
Ми беше чест и задоволство да работам, да им служам на граѓаните и да ја претставувам Македонија како туристичка дестинација.
Како и претходно, ќе продолжам да работам во туризмот и будно ќе ги следам случувањата во овој сектор“.
Владата го разреши Донев поради, како што беше наведено несовесно и невнимателно работење.
Донев беше цел на критика на јавноста во ноември минатата година, кога се објави дека тој патувал до Аргентина со лет од бизнис класата, со што платил 220 000 денари.
Тој е долгогодишен граѓански активист и учесник на Шарената револуција.