Министерството за надворешни работи доцна попладнево излезе со реакција на интервјуто на рускиот шеф на дипломатијата Сергеј Лавров.
Во реакцијата се вели:
Во врска со интервјуто на МНР на Руската Федерација, Сергеј Лавров во кое се споменува Република Северна Македонија во неприфатлив контекст, посочуваме за следното:
Од стекнувањето на независноста на Република Северна Македонија постои силно меѓуетничко и надпартиско единство за членство во Европската Унија.
Нашето Собрание пред повеќе од 30 години донесе едногласна одлука за ваквата надворешно-политичка ориентација на земјава.
Таквите одлуки за зачленување во меѓународни сојузи, како и секоја друга суверена држава ги донесуваме водени исклучиво од сопствени интереси со поддршка од најголемиот број на граѓани.
Во изминатите години сите политички чинители даваа значаен придонес во имплементација на ваквите стремежи.
Денес Република Северна Македонија е полноправна членка на НАТО, заедно со нашите сојузници целосно сме посветени на сочувување на меѓународниот мир и безбедност при што најостро се спротивставуваме на сите кршења на меѓународното право, каков што е случајот со агресијата врз Украина.
Истовремено постојано се бориме против сите злонамерни влијанија од трети држави со цел мешање во нашите внатрешни работи.
Во интервјуто се манипулира со религиозните чувства на православните верници во нашата држава и се користи добивањето на автокефалноста на МПЦ- ОА за промовирање на своите геополитички ставови.
Овој историски настан никој не смее да го присвојува како свој успех, особено не оние кои прикриено се противеа на ваквиот чин.
Во интервјуто што денес беше објавено Лавров рече дека „Западот се обидува да ги претвори Црна Гора и Северна Македонија во алатка во анти-руската игра.
„Се гледа разликата помеѓу она што Црногорците и Македонците го чувствуваат за Русија и она што нивните политичари се принудени да го прават од Брисел, ЕУ и НАТО. Ова е обид да се претворат во „алатка“ во анти-руската игра“, рече Лавров.
„Земјата се преименува во Северна Македонија за да влезе во ЕУ, каде што не беше прифатена и нема да биде прифатена во скоро време. Наместо тоа, тие ги вовлекоа во НАТО, почнаа да ги загреваат русофобичните чувства, агресивната политика кон Руската Федерација. Истото го направија и со Црна Гора: ветија дека ќе влезат во ЕУ, но рекоа дека треба да влезат во НАТО, да се приклучат на санкциите и да заземат став кој е отворено антируски. Тажно е тоа“, смета Лавров во интервјуто.
Тој исто така додаде: „Бев во посета на Скопје и Охрид, видов како луѓето во Македонија се однесуваат кон нашата заедничка историја и религија. Бев и во Црна Гора. Посетив манастири и храмови“.
Лавров позитивно ја оцени одлуката на Архиерејскиот собор за Српската православна црква (СПЦ) за признавање на автокефалноста на Македонската православна црква (МПЦ).
„Ова обновување на евхаристичкото единство меѓу СПЦ и МПЦ го оценувам како позитивно. Тоа е разумна одлука на СПЦ и патријархот Порфириј“, вели Лавров.
Според министерот, „ова е достоен одговор на интригите на цариградскиот патријарх“.
„Тој се обиде засекогаш да го закопа секој однос меѓу другите православни цркви, пред се српската и македонската. Овој провокативен план е спречен“, нагласи Лавров и додава:
„Со обновувањето на канонското општење меѓу СПЦ и МПЦ доаѓа до повторно воспоставување на евхаристичкото единство со Руската православна црква, за што сме заинтересирани. Сигурен сум дека тоа ќе послужи за доброто на православието“, заклучи Лавров во интервјуто. (С.К.)