Пет дена по смртоносната несреќа на три возови во Индија, во која загинаа 275 луѓе, речиси 100 тела остануваат неподигнати.
Во несреќата во петокот вечерта во државата Одиша учествувале два патнички воза и стационарен товарен воз.
Повеќе од 1.000 повредени се пренесени во болници на лекување. Многу семејства велат дека се уште ги бараат своите најблиски.
Смртоносниот судир е најтешката железничка несреќа во Индија овој век.
Во несреќата патнички воз излета од шините откако погрешно влегол во колосек покрај главната линија и се судрил со стационарен товарен воз што бил паркиран таму. Неговите вагони кои излетале од шините потоа удриле во задните вагони на вториот патнички воз што одел во спротивна насока.
Се претпоставува дека повеќе од 3.000 патници патувале во двата воза, а извештаите велат дека и двата биле преполни.
Очајните членови на семејствата на патниците од Одиша и други држави ги преполнија болниците, барајќи информации за своите најблиски. Но, во некои случаи, идентификувањето на телото се покажува како вистински предизвик.
Во случаите кога имало повеќе од едно семејство кои побарале тело, се правело ДНК-тестирање за да им се помогне на семејствата со идентификација. Неидентификуваните тела ќе се чуваат во болничката мртовечница во следните 10 дена, а потоа владата ќе ги кремира или закопа.
Извор: Би-Би-Си