Владата прави проценка колкава е штетата што ја предизвикале дождовите и поплавите во Државниот архив. На вчерашната владина седница биле разгледани можни решенија за проблемот, но конечно решение допрва ќе биде донесено.

-Ова е резултат на исклучително нелогично однесување на претходната Влада, но нема да навлегуваме во тоа. Решението кое ќе го донесе Владата ќе биде долготрајно, во интерес и заштита на Архивот затоа што сме свесни дека тие документи се национално богатство на Република Македонија, изјави владиниот портпарол Миле Бошњаковски.

Како што рече тој, во врска со старата зграда на Архивот, кај комплексот судови, е направена таква конфузија што не е сигурно дека оваа институција ќе може да се врати во старите простории.

-Кое било решение не може да биде идеално ни за Јавното обвинителство ни за вработените во Архивот. Приоритет ни е да го заштитиме националното богатство и материјалите. Второ,  важно е Архивот да продолжи со својата работа, а лабораторијата да почне да архивира материјали и да донесеме решение кое ќе биде функционално, рече Бошњаковски.

Тој додаде дека не е само таа зграда,, туку дека 90 отсто од објектите на „Скопје 2014“ се со истите проблеми.