Министерот Оливер Спасовски денеска во Собранието на Република Македонија имаше работна средба со претседателот на Собранието Талат Џафери, координаторите на пратеничките групи и претседателите на комисиите за одбрана и безбедност и на комисијата за надзор на следење на комуникациите, на која ги извести пратениците за реформите во МВР односно имплементацијата на препораките од извештајот на Прибе.
-Изминатите години прислушувањето создаде сериозна политичка криза и токму затоа нашата одговорност во правење на вистинска реформа е многу значајна. За мене е најважно да имаме инклузивност во овој процес и преку една отворена дебата да дојдеме до најсоодветното решение и реформа која што ќе биде на крајот ефикасна реформа, која што ќе создаде заштита на системот на следење на комуникациите и заштита на човековите слободи и права, рече министерот Спасовски.
Министерот Спасовски најави дебати со претставници на невладиниот сектор и експертите од оваа област.
-Веќе разговаравме со парламентарните комисии за надзор на Управата за безбедност и на системот за следење на комуникации и посакуваме да се изврши контрола во МВР, кога за тоа ќе оцени Парламентот дека треба да се направи. Исто така посакуваме и да имаат екпсертска помош која што ќе може да гарантира добра контрола на системот за следење на комуникациите, бидејќи е најважно е да се констатира тоа дека во Република Македонија немаме незаконско следење на комуникациите, рече Спасовски.