Фотографијата на 3-годишниот Ајлан Курди, најден мртов пред точно една година, на 2 септември 2015 година, на една плажа во Бодрум, го трогна целиот свет. Политичарите ветуваа дека ваква трагедија повеќе не смее да се случи и дека мора да се најде решение за илјадниците луѓе кои во страшни услови бегаат од војна и умираат во морињата.
Германскиот дневник Билд го пронајде таткото на малиот Ајлан. Абдула Курди кој ги загуби двата сина, Ајлан и 5-годишниот Галип, и сопругата Рехаб се сеќава на овие трагични моменти:
“По смртта на моето семејство политичарите рекоа – ова никогаш повеќе. Сите сакаа по секоја цена да направат нешто поради фотографијата која го обиколи светот и која ги растажи. А сега? И понатаму има мртви и никој ништо не прави”, вели 41-годишниот татко.
Тој не жали што фотографијата на неговиот син била објавена низ целиот свет и смета дека “тоа мора да се покаже за да можат луѓето да видат што се случува. Ужасот во Сирија мора да конечно да заврши. Исто како и трагедијата на егзилот”.
Ајлан беше погребан на 4 септември 2015 година во Кобане заедно со братот и мајката.
Денес таткото живее во Ербил во ирачкиот дел на Курдистан.