Објектот на ЕВР Карпош доби нов лик.
Обновена е старата дотраена кровна конструкција, како и санитарната, водоводната, канализациската и електрична инсталација. Санирана е топлотната инсталација, заедно со извршени надворешни и внатрешни столарски и молерофарбарски активности и надворешно фасадирање на објектот, за што биле издвоени 21 милион денари.
Министерот за внатрешни работи Оливер Спасовски, посочи дека инфраструктурата на која било институција, пред сè во поглед на нејзината материјална и техничка опременост, стандардизираноста и човечки ресурси е суштински предуслов за нејзино ефикасно и квалитетно работење.
„Годинава продолжуваме со градежно-реконструктивни активности и на други објекти за кои е проценето дека е неопходно тие да бидат санирани, како што е Центарот за обука во Идризово, Одделот за граѓански работи во Македонската радио-телевизија, нова Полициска станица во Аеродром, при СВР Скопје. Остануваме целосно посветени на нашите зацртани плански активности за севкупно подобрување на стандардите за работа и функционирање на сите организациски единици при МВР“, рече Спасовски.
Во рамките на овие активности, министерот за внатрешни работи соопшти дека од почетокот на неговиот мандат досега реконструирани или санирани биле над 70 полициски објекти.
Прашан дали има пријавени Албанци на огласот за прием на обука во Специјалната единица Тигри, министерот информираше дека согласно известувањето од службите, пријавени има од сите националности. Тој додаде дека секој еден кандидат кој ќе ги исполни сите критериуми и стандарди и ќе биде посветен на својата работа, согласно Правилникот пропишан за оваа единица за него ќе претставува голема чест да биде дел од Тигрите.
(Извор: МИА)