Во последните 24 часа во Индија се регистрирани најголемиот број Корона случаи било кога во светот. Во само еден ден регистрирани се 314,835 случаи, а од тие 2,104 се смртни случаи – просекот на смртни случаи оваа недела во Индија беше 1,648 дневно што значи дека смртноста сега е значајно зголемена. Рекорден број случаи кој стигна блиску до денешниот број беше достигнат само во САД на 9ти Јануари, 2021 кога беа регистрирани 278,920 случаи во еден ден. Иако бројките во Индија се екстремно високи, сепак треба да се напомене дека Индија е држава со 1.366 милијарди жители, а САД е држава со 328 милиони, што значи дека рекордните инфекции биле процентуално повисоки во САД.
Вкупниот број на активни Корона случаи во Индија е 16 милиони и е земја само втора по ред после САД во оваа статистика. Овие драстични бројки се должат на огромниот втор бран кој ја удри Индија, кој за сега нема покажано знаци на било какво успорување. Иако оваа година изгледаше дека Индија ја имаше ситуацијата под контрола до некој степен, се смета дека овој бран се должи на олабавувањето на мерките во последниот месец, како новите варијации и мутации на Корона вирусот.
109 милиони жители во Индија имаат добиено една доза од некоја од вакцините и 17 милиони се целосно вакцинирани. Но дури и со ова темпо на вакцинации изгледа дека земјата сепак се соочува со голема криза на Ковид случаи, најголемиот проблем за сега е недостигот на кислород во болниците.
„Постојано добивам повици од очајни пријатели и членови на семејството кои бараат помош за наоѓање кревети и лекови. На некои сум во можност да им помогнам, а на некои не можам,“ кажува индискиот репортер Викас Пандеј од градот Делхи за BBC News. „Јас лично знам за многу случаи каде пациентите починале затоа што не можеле да добијат кислород на време. Им се кршат срцата на семејствата кога ќе слушнат дека болницата во која се лекуваат нивните најблиски наскоро може да остане без кислород.“
За разлика од лани, не постои целосен државен локдаун туку Ковид мерки се спречуваат на регионално ниво. За да спречи уште поголем број случаи, главниот град Делхи (кој има популација од скоро 19 милиони жители) најави еднонеделен локдаун кој ќе почне од викендот, оставајќи ги отворени само владините канцеларии и основните услуги како болници, аптеки и супермаркетите.
Но не сите сметаат дека овие мерки вистински ќе помогнат. Пред да стапи на сила локдаунот во главниот град овој викенд, илјадници работници мигранти пробуваа што побрзо да стигнат на автобуските терминали во предградијата на Делхи за да можат да стигнат до помалите градови каде што тие живеат. Службениците за јавно здравје предупредуваат дека масовниот егзодус од Делхи може да доведе до нови кластери на Ковид инфекции.
Исто така некои сметаат дека бројот на новозаразени Ковид пациенти е всушност многу повисок заради недостигот на Ковид тестови. Дури и градоначалникот на општината Северен Делхи изјави дека смета регионалната влада на Делхи регистрира понизок број смртни случаи отколку што реално се случуваат.
Ќе видиме дали по регионалните рестриктивни мерки ќе се намали овој висок број на случаи или пак поради лошата организација околу транспортот на работниците мигранти овој број само ќе се зголеми, продолжувајќи ја веќе постоечката криза.
Елена Гаговска