Високи функционери на Републиканската партија бараат широка истрага за конекциите со Русија на доксорешниот советник за национална безбедност на Доналд Трамп.
Мајкл Флин, поднесе оставка во понеделникот навечер, откако е откриено дека разговрал со рускиот амбасадор во САД, Сергеј Кисљак за санкциите кои администрацијата на Барак Обама ги воведе за Москва пред Трамп да ја преземе должноста и со тоа го измамил потпретседателот на САД Мајкл Пенс дека тој разговор не постоел.
-За жал, поради брзиот развој на настаните, ненамерно не го информирав потпретседателот на Пенс и другите за нецелосната информација во врска со мојот телефонски разговор со рускиот амбасадор. Искрено се извинив на претседателот и на потпретседателот и тие го прифатија моето извинување, напиша Флин во оставката.
Тој претходно му рекол на потпретседателот Пенс дека не разговарал со овој амбасадор, а таков контакт би можел да биде и кршење на американскиот закон, бидејќи на обичните граѓани не им е дозволено да водат надворешна политика.
Ваквиот развој на настаните доаѓа откако Њујорк Тајмс објави забелешки од телефонски разговори помеѓу луѓе на Трамп кои работеле за време на кампањата со руски разузнавачи.
ФБИ, Сенатот и комитетите за разузнавање веќе започнаа истрага за руското инволвирање во изборите, а се уште не се знае кои луѓе се под истрага.
Русија не сакаше да ја коментира оставката на Флин и наводите дека руски разузнавачи разговарале со луѓе од администрацијата на Трамп која се уште немаше стапено на функција.
Дмитри Песков, портпарол на Кремљ вели Американците сами треба да си ги решаваат работите.
„Ова е внатрешна работа на Американците, односно на администрацијата на Трамп. Ова нема врска со нас“, кратко искоментира Песков.
Според американските закони, цивил не смее да преговара за надворешната политика во име на САД со други земји, а токму тоа е прекршокот на Флин.
(ВИДЕО) Изборот на Трамп: Кои ќе бидат неговите најблиски соработници